Seminar bahin human immunodeficiency virus (HIV) ngan acquired immunodeficiency syndrome (AIDS) an gin-organisar han Department of Education Tacloban City Division kasugbong an City Government of Tacloban.
Sobra 200 nga mga partisipante nga ginkokomponer han mga magturutdo nga mga estudyante nga tikang han 5 nga eskwelahan tikang ha District Learning Center VII sugad han San Fernando Central School, Judge Antonio R. Montilla Elementary School, Utap ES, Don Vicente Quintero Memorial ES, ngan Tacloban City Night High School nga amo an nanguna han nasabi nga information, education campaign dida han Oktubre 18, 2023.
Usa hi Assistant City Health Officer Dr. Gloria Fabrigas han mga resource speakers han seminar ilarom han SANA ALL: Sustainable And Nurturing Adolescent health for ALL nga kampanya diin kaupod niya hi Dr. Paulyn Jean Rosell-Ubial, anay nga health secretary han Department of Health ug hi Dr. Lutgardo Sicam, anay nga presidente han Davao Medical Society nga gin-presentar an kahimtang han HIV-AIDS cases ha bug-os nga Sinirangan Visayas.
Pagpapangbit ni Dr. Sicam, nakaka-alarma an tigda nga paghataas hin 150% han mga kaso tikang han July 2022 nga mayda 20 nga bag-o nga mga kaso nga nag-abot hin 1,536 tikang han tuig 1984. An kaso naman han namatay in maabot 6.18% nga na-total 95.
Mahitungod hini, mas kinahanglan nga pabaskugon an awareness campaign para han mga kabataan ngan ipahibaro nga diri maulang pagpakonsulta kay may mga abilable nga treatment hubs ha rehiyon, pagdugang ni Dr. Sicam.
An implementasyon hini nga district level school-based information drive in nakapailarom han DepEd Order No. 47, s. 2012.
Labot han mga hibaro nga napurot han mga partisipante, mayda gihapon reference material bahin HIV, AIDS ngan sexually transmitted infection an gin-distribwer ha mga eskwelahan. | via cbm/CIO