Nagsasagawsaw nga sirit han walo (8) nga una natauran hin tubig ha ira mga balay ha Villa Sofia HA Brgy. 108 Tagpuro, tikang ha Prime Water Leyte Metro.

Hi Marcela A. Malate, tulo pala ka adlaw an nakalabay tikang hira matauran han tubig, sanglit dako gud an iya pasalamat kan Mayor Alfred S. Rromualdez ug han bug-os nga City Government of Tacloban nga usa hiya han una nga natauran han tubig. Siring ni Marcela, eksakto gud la an timing kay diri pa hiya pwede mag inalsa hin balde pag-aalog kun diin-diin para la hira magkaada hin tubig- pero yana aada na mismo ha ira balay, nabirik nala han gripo nagsasagalwak na an tubig.

An 63 anyos liwat nga hi mana Bebet Nacario, natauran na gihapon hin tubig direkta ha ira balay. Sugad han kanda Marcela makusog gihapon an tubig–nagsasagirit, pero siring ni mana Bebet, napaed man hiya han mga amyaw nga nag-aalog pala han tubig, sanglit iya gin papasalud an mga amyaw samtang naghuhulat pa nga matauran liwat.

Kanina han aga, ginbisita ni Mayor Alfred S. Romualdez an Brgy. 108 Tagpuro ngan iya igin kahimangraw an mga Brgy. Officials nga ginmamangulohan ni Brgy. Kap. Rachel Lacaba, komo kaparte han iya panginano han mga development projects nga iya iginpapatuman ha Norte Tacloban.

Samtang an Team nira Mrs. Ruth Ramirez, tikang ha Tacloban City Hall North Extension Office, naglilibot liwat agud mapanginano kun may-ada problema an mga linya komo kaparte han monitoring—kun diin may ada nira nahiagian nga leaking pipe ngan dagmit nira igin report ha water district agud maaksiyunan.

An Villa Sofia ha Brgy. 108 Tagpuro an ika napulo na nga pabahay site han siyudad nga natauran na hin tubig nga padayon ginbabalay-balay na yana an proseso agud nga matauran na an kabug-osan.

M. Padernos/CIO