Tacloban City ( Aug. 25, 2021)- Yana nga adlaw opisyal nga nagkaada hin legal personality an Dream Ville Public Transport Workers Association (DPTWA) ha CRS Pabahay, luyo han Eastern Visayas Medical Center (EVMC) ha Brgy. 93 Bagacay kahuman nga hira in papanumpaon ha katungdanan ni Mayor Alfred S. Romualdez.

Ini nga masobra osa ka gatos nga mga kaapi han asosasyon, in yana namamasahero komo ira pakabuhi ha sulod pala han mismo nga pabahay, ngan tikang ha ligid han highway (EVMC dapit) tipakadto ha sulod han CRS pabahay subdivision.

Yana kay may-ada na nira legal personality komo osa nga asosasyon makakag apply na hira hin prangkisa ha City Hall para han ira official nga magigin ruta ha pamasaheros ha Norte Tacloban nga dapit.

Siring ni Mayor Romualdez, ha pinaka madali nga panahon ngan ipinaagi han konseho, igpapasa in osa nga ordinansa nga maghahatag han prangkesa nga iya man liwat dayon aaprobaran agud hul-os na nga magin legal an pagbibiyahe han mga tricycle ha kada asosasyon ha Norte Tacloban.

Ha yana, siring pa ni Mayor Romualdez, iya la anay ginhangyo ha Highway Patrol ngan LTO nga kun an may mga tricycle tikang ha Norte Tacloban in may-ada gud importante nga tuyo ha downtown han siyudad, tugotan la anay nga umagi ha highway- ha kundisyon nga aadto la hira malugar ha Outer Lane (sapit hiton gutter) han highway nga asya an para hiton mga maghinay la nga sarakyan para likay disgrasya.

Komo presidente han asosasyon, dako an pasalamat ni Brgy. Kapitan Arlene R. Ibañez han bulig ngan han mga ibubulig pa ni Mayor Alfred haira.

M. Padernos/CIO