Tacloban City, Philippines (4.08.21) – “Kamo nga kumarawat han mga housing units, kumilala kunta kamo han Diyos nga amo an surok hini nga dako nga grasya nga iyo nakarawat”.

“An iyo pagpaangbit han iyo mga hi-agi, pagbulig han mga nanginginahanglan nga mga tawo amo an pinakaepektibo nga paagi pagsangyaw han gugma ni Kristo”.

Ini an mga suluran ngan puno hin inspirasyon nga mga pahayag ni Most Rev. John F. Du, Arsobispo han Palo, nga amo an nagmisa kanina ha Redemptorist Church san-o an panhatag han mga titulo han 303 ‘completed house units’ ha Pope Francis Village ha Norte Tacloban.

Siring ni Bishop Du, an ano man nga grasya nga nakakarawat han kada tawo diri ini ngatanan para la ha iya, kundi paagi ini han Diyos nga ikaw in magin channel o agi-an nga maipaangbit ini ngadto han iba nga mga nanginginahanglan.

Ayaw suloha an grasya, kundi igpaangbit ini ngadto han imo mga amyaw kay ini an kabubut-on han Diyos ngan Iya iginkakalipay, siring ni Du.

Ini nga nagin homily ni Bishop Du in sumentro han pauna nga 303 house units ha Pope Francis Village komo ayuda han mga nabiktima han bagyo Yolanda dida han 2013, kun diin nahimo ini nga kabalayan ha pag burubligay han iba-iba nga sektor sugad han simbahan, national government, local government ngan mga pribado nga mga tawo nga nagpaangbit han ira mga hi-agi hasta nga nabug-os an milyones nga kantidad hin salapi nga gingamit, matindog la ini nga relocation housing units.

Ha ngaran han bug-os nga mga kaapi han Pope Francis Village Home Owners Association, dako an pasalamat ni Philip Lumbre, Presidente han PFV HOA, ngadto han mga nagburublig nga mahimugso ini nga ira mga balay yana ha Norte Tacloban.Samtang, hi Raymund Romualdez, Presidente han Tacloban Business Club nga nagtambong han misa dida hini nga aktibidad in gin bendisyunan ni Bishop Du, upod in laktud nga pag-ampo haiya han iya pagkilala han Diyos.