Tag singko mil (P5,000.00) nga starting capital/additional capital it ipanhahatag ni Mayor Alfred S. Romualdez yana nga adlaw, Oktubre 27, ha mga taga pabahay nga nakag pailarom han Financial Management Training han Department of Trade and Industry (DTI) panahon han Entreprenuerial Workshop hadton Oktubre 19 ha Norte Tacloban.

Sumala kan City Social Welfare and Development Officer (CSWDO) Chona A. Bahin, usa ini nga inter-agency project nga ginburobligan han City government of Tacloban, National Housing Authority (NHA), Department of Trade and Industry (DTI), CSWDO ngan North Tacloban City Hall Extension.

Ala una (1:00 p.m.) niyan nga kulop bubuhaton ini nga aktibidad ha North Tacloban City Hall Extension Office nga pagtatambongan ni Mayor Romualdez ngan han mga kaapi han inter-agency, siring ni Mrs. Ruth Ramirez, Head han City Hall Extension Office.

Kasumpay hini, dugang nga pahayag ni CSWD Officer Bahin, 39 ini nga mga entrepreneurs tikang han mga pabahay han Pope Franics Village, Villa Sofia ngan Greendale nga tatagan hin tag P5,000 nga puhonan ha negosyo han mga magtitikang pala, o di man ngani kadugangan nga pundo han daan na may-ada negosyo.

Panuyo han Financial Management training, nga mapadalagan hin maupay an anuman nga negosyo nga pag gagamitan han kwarta agud masiguro nga magigin malinampuson hira, siring ni Bahin.

Labot la hini, manhahatag gihapon hi Mayor Romualdez han iba pa nga mga financial assistance, sugad han burial assistance and medical assistance.

M. Padernos/CIO