Tacloban City, Philippines (4.20.21)—- Ha mando ni Mayor Alfred S. Romualdez, full force an City government ha pag responde kakulop, April 19, han sunog ha Brgy. 74 Nulatula national highway diin nasunog in usa nga hardware nga nabubutnga pa gud hin duha nga mga gasoline stations.

Dapit alas 8:00 pasado han aga nagtikang an sunog, maakusog pa an aro-alipuros han hangin hini nga panahon dara han bagyo Bising, ngan kun waray magin abtik an mga bombero posiblé nagdako pa an sunog mahitungod nga nabubutnga ini han duha nga gasolinahan, Shell ngan Flying V.

An mga bombero tikang ha City Fire department pati an mga volunteer fire brigade in nagburublig agud nga maparong dayon an kalayo, samtang an mga taga TOMECO ngan mga police bantay trapiko ngan siguridad han lugar.

An mga taga CSDWO han siyudad, gin atenderan dayon an mga biktima han sunog nga mga magtratrabaho han hardware, nga solo lawas la nga nakagawas han ira hardware. An mga stay-in workers nanhibilin an ira mga gamit, panapton ug iba pa ngan upod nga naugbaw dida hini nga sunog.

Mismo hi City Disaster Risk Reduction and Management Officer (CDRRMO) Brando Bernadas an nanginano han sitwasyon agud nga maihatag dayon an kinahanglan nga ayuda tikang ha City government.

Subay han pauna mga impormasyon tikang mismo han mga magtratrabaho hini nga hardware, an gin paandar nga generator set an gin-aalegar nga bumuto nga nagin hinungdan han sunog.Kundi an mga fire investigator in nagdumara han imbestigasyon agud matukib han hinungdan han sunog.

M. Padernos/CIO