Himsug nga panlawas han mga tawo ha mga barangay labi na an mga bata ngan mga nanay.Ini an rason nga an pamunuan han siyudad ha liderato ni Mayor Alfred S. Romualdez, nanhimo hin mga Health Centers ha Norte Tacloban kun diin nagtitikadamo an populasyon agud nga sebisyohan an katawhan mismo ha ira barangay nga diri na kinahanglan pa mag gasto hin dako nga oras ug kwarta para masingadto ha sentro han siyudad nga City Health Office.

Ha Barangay 108 Tagpuro, an mga personales han City Health Office, Department of Health, kaupod an mga Barangay Health Workers in sinemana an pag dudumara han routine o ordinaryo nga pagbakuna ha mga burod nga kababayin-an ug immunization naman han mga kabataan.

Nakahimangraw han News Team an pira nga mga nanay, siring nira dako gud nga bulig ha ira an serbisyo ha panlawas nga gindadara mismo ha ira barangay mahitungod nga naatenderan nira an ira mga anak ngan nakakabalik dayon ha ira balay.

Samtang dako an pasalamat ni Kapitana Rachel N. Lacaba han Brgy. 108 nga bumisita hi Mayor Alfred S. Romualdez ha ira barangay ngan personal nakita an ira gindudumara nga serbisyio ha panlawas han mga kabataan. Lakip iginpasalamat ni Kapitana Lacaba an padayon nga suporta han City government hini ha ira barangay.

Ha barangay 106 Sto. Niño, particular ha GMA Kapuso pabahay, lakip an mga katakip nga mga pabahay han siyudad, aadto liwat an tulo ( 3) ka andana ngan bag-o nga District Health Center nga, diri pala maiha nahuman ug mahigagamitan na ha diri na maiha nga panahon.

Kundi ha pagka yana nga, an temporary nga Health Center pa an gin gagamit (sapit la han bag-o) kun diin an mga taga Norte Tacloban in pwede la kumadto kada adlaw para han serbisyo medical.

L. Jopson/CIO