TACLOBAN CITY (7.05.21) Para matagan hin mas maupay nga surok hin tubig an Guadalupe pabahay, An Hiraya Foundation nga ginmamanguluhan ni Raymund Romualdez nga anak ni City Mayor Alfred S. Romualdez, nakigsumpayan ha City Government of Tacloban agud nga dugangan hin temporaryo nga surok hin tubig an mga tawo.

Dida han Sabado Hulyo 03, 2021, nakigharampang hi Raymund han mga taga Guadalupe- diin naiplastar han mga tawo an ira numero uno nga problema- an tubig.

Dida mismo hini nga ira miriting, usa nga Water Tanker Truck an umabot ngan iginsulod ini ha mga stainless water tanks nga naka instalar ha mga ligid han dalan. Dida hini an mga tawo nagrisyo han panalud han tubig.

Komo Founder han Hiraya Foundation, hi Raymund Romualdez in nakigsabot ha City government nga an Guadalupe in dideliveran hin tubig, tulo ka beses ha usa ka semana (Martes, Huwebes ngan Sabado).

Ini ngatanan, in temporaryo la samtang sige pa iton trabaho para han water connections nga diretso na gud ha ira mga balay. Labot la han pasalamat han mga tawo, an Cluster President nga hi Ronald Dosal Sabela dako gud an pasalamat hini kay nadugangan an ira surok hin tubig nga sumala pa ha iya, ira ginhihimu-an dayon hin maupay nga sistema para magsasarahid han tubig ngan diri magkaka dirodiperensiya an mga tawo.

M. Padernos/CIO