Tacloban City– Naghuhugas hin sarakyan, nagkakrisyo nga nangangarigo hirani han gripo, nagsasalud hin tubig, nakahilera nga mga water can para saluran hin tubig — ini iton mga kumon nga makikita ha mga pabahay ha Norte Tacloban kun diri pa ngatanan natatauran hin tubig diretso ha ira mga balay.

Kuha ini ha UNDP pabahay ha Brgy. 97 Cabalawan, diin an mga kabataan bisan kun nahinguto-uto an sirak nakada nagsasalud, nakarigo, naghuhugas hin sarakyan.

Samtang gintratrabaho ngan gin proproseso pa an mga application para hin water connections diretso ha ira mga balay, nakukuntento nala anay hira hini nga kumon nga alugan ha ira relocation site.

Siring han pira nga napakianhan, mas maupay ini yana kontra han nakadto pa hira ha hirayo pag-aalog.

Ini nga kumon nga gripo in temporaryo nga iginbutang han City Governrment of Tacloban ngan han LMWD samtang sige pa an trabaho han mga linya diretso ha mga balay.

Dako an paglaum han mga residente dida hini nga UNDP pabahay nga ha diri maiha matatauran na hira hin mga tubo diretso ha ira mga balay kay an ira atbang nga pabahay, an Lions, in may-ada na tubig deretso haira mga kusina ngan banyo.

M. Padernos/CIO