An nakakaulang nga poste ha butnga han national road ha dapit han Eastern Visayas Medical Center, dalan Maharlika, amo in gintangal na yana nga aga.

Ini in nahimugso ha paningkamot han City Government of Tacloban ha ilarom han liderato ni Mayor Alfred Romualdez nga matanggal na ini tungod nga ini in obstruction ngan dako an kadelikadohan nga puwede igdurot kay ada ini ha butnga han kalsada kun diin nangangagi iton mga tawo ngan sarakyan.

Yana nga adlaw, Nobyembre 12, an LEYECO II, mahuman makarawat an letter request han lokal nga pangobyernohan, dayon ini gin-aksyonan ha pangunguna ni Roland Cueryzon, LEYECO II Heavy Maintenance Section Head.

Nabaruan nga nadelatar an pagtangal hini tungod nga naghulat pa hin katugutan tikang ha mga cable companies nga nakab-it ha mao nga poste.

Temporaryo naman nga gintak-opan hin mga bato an 5 ngada 6ft nga buho–nga kun diin gintanggalan an siniring nga obstruction; ngan dayon naman nga sesementoun han team han City Engineer’s Office para han seguridad han mangaragi ngan mga motorista.

Sumala han LEYECO II, panguna pala ini han ira operasyon pananggal han mga nagpapakaulang ngan waray na gamit nga mga poste ha palibot han syudad. Mahitungod hini, gin-aaghat nga makipagsumpayan ha ira buhatan an mga hintutungdan kabahin hini nga nasabi nga operasyon.

D. Ortega/CIO