Waray na kulba diri na hira mapapaiwas pa dida han tuna nga tinitindogan han ira mga balay–ini in kahuman ipanhatag ni Mayor Alfred S. Romualdez an Certificate of Confirmation ha kada pamilya ha Brgy. 37-A Palanog.

Siring ni Warren Dauz, Presidente han Palanog Home Owners Association, pauna nga 95 nga Certificate of Confirmation an ipinanhatag ni Mayor Alfred kanina han aga- ini in para la han Purok 1 and 2 anay.

May-ada pa masunod nga Purok 3, 4 ngan 5 nga yana gin aasikaso han City Housing and Community Development Office (CHCDO). Ha kabug-osan, maabot hin 246 ka balay ngatanan an lima ka Purok, siring ni Dauz.

Hini nga nahitabo kanina, dugang pa ni Dauz, duro gud an ira pasalamat nga tungod hini nawara na an ira kabaraka nga mapaiwas ha tuna nga gintutudkan han ira mga balay.

Sumala pa kan Dauz, an Palanog an gi-uunahi nga relocation site ha Tacloban tikang pa dida han 1972 nga hira in nahingada hini nga lugar, nga hadto na edad pala hiya hin 15 anyos—yana 57 na hiya o 42 anyos an nakalabay nakaptan gihapon nira an Certificate of Confirmation ha bulig han kan Romualdez administrasyon.

Ini nga lugar, gintatag-iyahan han City Government an tuna, kundi an mga balay, may hin tindog la an mga tawo. Yana kun diin natindog an ira balay asya an ginhimoan han Certificate of Confirmation komo pagka matuod nga hira gud an aada maukoy hasta ngada han kahasta.

M. Padernos/CIO