Tacloban City (January 17, 2022)– An kamasirum hin mga lugar in nakakagduso han mga magraot nga mga elemento nga magbuhat hin krimen dida mismo han ira kuminidad nga ginpupuy-an.

Para malikayan ini, mando ni Mayor Alfred S. Romualdez, nga pamutangan hin mga street lights an mga lugar nga magsirum labi na kun diin damo an nanngungukoy sugad hiton mga pabahay ha Norte Tacloban.

Dara an boom truck han CGSO, ginkakadto han mga lineman an mga lugar nga kaangayan butangan han street lights – an extendable boom an gintutungtungan han lineman para maabot an igbaw han poste nga pagkakab-it han wire ngan bombelya.

Ha butnga han ira trabaho, usahay mahiabtan hira han sirak ngan uran dara han tigda la nga pagbabalyo han huyop han panahon, kundi padayon gihapon an trabaho.

Ha Brgy. 106, Sto. Niño nahiaabtan han news team an mga taga CGSO nga nagmomontar han mga wire para han streetlights.

Sakop ini nga dapit han GMA Kapuso Village, UN Habitat, ngan Aeroville pabahay.

Hangyo han City government nga hirutan ini nga streetlights ngan diri pag kab-itan hin iba nga linya hin kuryente kay bangin magin hinungdan hin sunog o pagka kuryente hin mga tawo.

M. Padernos/CIO