Komo kaparti han pamaagi pagpaupay han operasyon han Tacloban City Public Market, gintututukan yana han pamunoan hine an pagpaundang han sub-leasing han mga stalls, sulod han Merkado Publiko.

An sub-leasing, nga igindidire hiton Market Ordinance amo iton pagpapaplete han iba nga mga stall owners han ira puwesto ha iba nga magtirinda ngan ginsusuktan hin hataas nga renta.

Sumala kan Acting Market Superintendent Danilo D. Alajas, mayda na nira naaktohan ha Carenderia Section nga nagbubuhat hine nga ilegal nga aktibidad. Subay han impormasyon an stall owner nasukot hin P 6,000 pesos nga plete han iya puwesto, samtang nagbabayad la ine hin balor P900 lease fee ha City Government. Nahisabotan ine nga aktibidad kahuman magreklamo an magtirinda ha ira opisina.

Pinaagi hin usa nga market resolution, gindisesyonan nga ighatag nala an katungod han mao nga puwesto han nagpleplete.

Samtang, ginpasabot gihapon han opisyal nga mayda na nira mga pitad yana pagpahitaas han renta han mga puwesto ha Merkado; ine tungod manggud nga barato pa an renta kay outdated na o maiha na an probisyon mga may kalabutan han renta dida han Market Code.

Siring han opisyal nga maiha na nagpahitaas hin plete ha Merkado Publiko an mga amyaw nga mga Local Government Units han Tacloban, pero an syudad barato la gihapon an renta tungod nga tuig 1975 pa an market code hine nga kinahanglan na amyendaran han City Council.

Igindanghala na nira ine ha City Council ha kometiba ni Councilor Brian Granados.

Kaparti pa gihapon han mga pagpakaupay han merkado publiko gin-organisar na han Market Operations an mga ambulant vendors hin mga grupo para mapapaspas an profiling hine ngan mahiapil han mga assistance o hinabang nga ginhahatag han local ngan national governments. Gintutugutan gihapon an mga vendors nga magbaligya la tinikangan 6:00p.m. hasta 6:00 a.m. ha merkado.

Kasumpay pa han mga plano para han merkado publiko an pagpatuman na hin cashless nga pamaagi ha pagbayad hin cash ticket han mga magtirinda kay usa ine han mga hinungdan hin “pilferage.” Kun mapatoman na ine, ha gcash na igpapaagi an bayad han cash ticket han mga ambulant vendors.

Gintutukan gihapon han Market Operation an problema ha mga “rugby boys” kay usa ine han mga hinungdan han pangawat nga nanabo ha public market, sanglit regolar nga naronda an market security hiton umagahon hasta alas 7 hiton aga.

Tungod han pagpatuman han mga bag-o nga palisaya, iginsumat ni Alajas nga humitaas an income han Merkado Publiko, tikang han Php 17 Million han 2021 hasta Php 22 Million pesos han tuig 2022 o 125 porsyento nga umento han collections ha Merkado Publiko. Ginlalaoman liwat han buhatan mga mahitaas pa ine tungod han padayon nga pagpatuman han mga bag-o nga palisiya.

#CIOUpdates

via H.J. Roca/CIO

Photo by R. Calipara/CIO