TACLOBAN CITY (Sept.15, 2021)- Aprobado na an P20M nga pundo para han titindogon nga Dry Market ha Norte Tacloban.

Ini an maupay nga sumat nga dara ni Mayor Alfred S. Romualdez haiya pakigharampang han mga taga Dream Ville panahon han binuhat nga induction of officers han Dream Ville Home Owners Association (Dream Ville HOA) ha Brgy. 93 Bagacay, kanina han aga.

Siring ni Mayor Romualdez, iya ini pinangaro nga bulig kan Senador Imee Marcos para mapundohan an dry market ha Norte Tacloban dara nga padayon nagtutubo an Norte nga dapit han siyudad nga kinahanglan butangan hin dugang nga merkado.

Sumala pa kan Mayor Romualdez, hira Leyte 1st District Congressman Ferdinand Martin Romualdez ngan Tingog Partylist Rep. Yedda Marie K. Romualdez in nabulig gihapon ha City government of Tacloban ha pagbutang hin mga pundo para hin mga proyekto ha siyudad.

An Hiraya Foundation President Raymund Romualdez in nagtambong liwat dida hini nga okasyon ngan siring niya may-ada gin-tratrabaho an Foundation nga hinabang para ha Brgy. 93 Bagacay.

Upod nga nagtambong hira City Councilor Imee Delgado- Grafil, komo Chairman han Committee on Housing ha konseho, ngan hi Brgy. 95 Caibaan Chairman Abet Eviota nga nagpahayag han plano dumalagan komo City Councilor ha 2022 elections.

Ginlalauman ni Mayor Romualdez nga iya magigin kasugbong an mga opisyales han HOA para han pag mintenar han kamurayaw ha Dream Ville- pati ha pagsulbar hin mga isyu nga angay tagan hin atensiyon dida hini nga dapit.

An Dream Ville- HOA in ginmamangulohan han ira Presidente Boy Estoque, nga dako an pasalamat kan Mayor Romualdez han padayon nga bulig haira kumunidad.

M. Padernos/CIO