Tacloban City, Philippines (2.18.21)—Sobra 2,500 iton mga Motorcab for Hire (MCH) ha Tacloban nga naka rehistro han 2020.

Ini nga ihap iton ginlalauman nga magre-renew kunta yana nga 2021 han ira mga business permits. Kundi, ngada yana, Pebrero 18, 2021 na, sobrahay 800 pala nga MCH iton nakag-renew subay hiton record han Business Permit and Licensing Division (BPLD) han syudad han Tacloban.

Ini an rason nga an BPLD in nag-aro na hin bulig ha TOMECO nga manakop ha kadalanan han mga waray pa mag-renew kay matatawag na nga illegal o kulorom an ira operasyon.

Sanglit, siring ni Restituto A. Reglos, Chief Operations han TOMECO, sobra 40 na iton mga MCH nga naka-impound ha Tacloban City Convention Center compound nga nagkadadakop han TOMECO han naglabay nga pira pala ka adlaw, ngan magpapadayon pa ini.

“Makuri man gud iton panalapi yana dara hini nga pandemic. Kay bisan iton mga pasaheros pipira pira la, sanglit makuri gud an pagbiling han kwarta pan renew”, siring hin usa nga driver operator nga waray nala magpangaran.

Sumala naman kan Reglos, kinahanglan gud maningkamot an mga tag-iya han MCH nga makag-renew hira han ira business permit kay asya manla gihapon, pananakpon hira ha dalan kun magbiyahe nga kulorum pa hira. Delikado pa ha ira, pati han ira mga pasaheros.

Dugang pa ni Reglos, ha mga masunod nga mga adlaw, posible isunod liwat pandakop an mga Public Utility Jeepneys (PUJ) nga waray pa gihapon makapan-renew basé hiton talaan han City Licensing.

An sobra 40 nga MCH nga una nagkadadakop, yana naibanan na hin haros katunga, kay an mga nagtatag-iya nagbiling dayon hin paagi nga makag-renew para diri maulang an ira pagbiyahe ha kadalanan.

M. Padernos/CIO