Nagdumara hin orientation ha mga vendors an opisina han Operation of Markets bahin han pagpatuman han Cashless nga sistema ha pagbayad han “cash ticket” ha Merkado Publiko han Tacloban City.

Sumala kan OIC Market Superintendent Engr. Danilo D. Alajas nga ini nga sistema nga ig-iimplementar may panuyoan nga mahimo nga hapsay an pagbayad han cash ticket han mga magtirinda ngan malikayan an pilferage o an diri pagbayad han market fees.

Yana manggud mano-mano o pinaagi ha mga kolektor an pagbayad han cash ticket, ngan poydi ini malisbotan, sumala pa han opisyal.

Subay pa kan Alajas nga mando ini ni Mayor Alfred Romualdez nga paupayon pa an operasyon han merkado, lakip na an pagpadako pa han income hine para hul-os nga matagamtaman han mga Taclobanon.

An cashless nga sistema ha pagbayad han cash ticket ginhimo han Management City Management Information Systems Office (CMISO) han city government ha pakikigsumpayan han Market Operations ngan City Treasurer’s Office. Magamit na ini hin mga scanning devices, ngan mayda na “mapping capability” para accurate o sakto an mga transaksyones.

Napailarom na ha orientation an mga vendors han North Wing Building ngan an Fruit and Vegetables ngan Carenderia Sections han central public market, sumala han opisina.

Samtang magpapadayon an orientation hasta Biyernes yana nga semana kay pagtungtong na hiton Hunyo 1, pagtitikangan na an cashless nga sistema ha may “Tarcela Block” han merkado nga mayda 30-40 vendors, ngan kun magin malinamposon ini hinay-hinay na ini nga igpapatuman ha bug-os nga Merkado.

Ha lain liwat nga bahin, iginsumat liwat ni Alajas nga ha iginpalusad nga mando han Ambulant Vendors Council nga pagsusuktan na hin kadugangan nga plete adton mga vendor nga nalapos han ira nakagahin nga lugar han pagtinda, ini kasumpay pa han pagpaurupay pa han operasyon han merkado.

#CIOUpdates

#MarketOperations

#TaclobanCity

via HRoca/CIO

File photo: Tacloban City Supermarket FB

Researcher: E. Lagahit/CIO