Tacloban City (Oct. 03, 2023)—Pormal nga gin-abrehan yana nga adlaw, Oktubre 03, 2023 an Regional Cooperative Month KicK-Off ha siyudad han Tacloban nga pinangunahan han Cooperative Development Authority Regional Office 8 (CDA-RO8).

Kahuman han motorcade ha mga panguna nga kalsada han siyudad, dumiretso ini ha Robinsons Place- Tacloban para han opening program nga gin-atenderan hin kadam-an nga mga kooperatiba diri la tikang ha siyudad han Tacloban kundi tikang ha iba-iba nga dapit han Region 8.

Pinangunahan ni CDA Regional Director Venus M. Jornales ( 2nd from L) an ribbon cutting komo senyales han opisyal nga pag-abre han han Cooperative month. Kaupod hini dida hi CCDLAO Head Ruena Mate (3rd from R), CDA ARD Maripaz M. Del Pilar ( 2nd from R),Robinsons Mall Admin Manager/OIC Abigail Ramirez, (in red) ngan iba pa nga opisyal han mga Kooperatiba.

“ Cooperatives: Pioneering the path to recovery amidst modern challenges of climate change and food security”- ini an ginpapatamakan nga tema hiton kanan yana nga tuig Cooperative Month.

An pinakabag-o nga nahimugso nga kooperatiba ha Tacloban yana la nga tuig amo an DRR Broadcaster Advocacy Cooperative nga nagin kaparte na han kanan yana nga adlaw aktibidad.

Gin-aghat ni Director Jornales an ngatanan nga padayon mayuyuon an mga kooperatiba, ngan padamoon pa kay osa ini nga mabakod nga kasugbong han gobyerno ha pagduso han ekonomiya ngan pakabuhi ha mga tawo.

Samtang, sumala kan CCDLAO Head Ruena Mate, yana nga maabot Oktubre 06, an buhatan han City Cooperative Development Livelihood Assistance Office (CCDLAO) in pormal liwat nga mag-aabre han mga aktibidad han Cooperative Month para han mga kooperatiba ha Tacloban nga aada ha pag mangno han ira buhatan.

Ha iba-iba la nga petsa hini nga bulan han Oktubre nakahilira an dirudilain nga mga aktibidad han mga Cooperatives.

Republic Act 11502- An Act Declaring the Month October of Every Year as the National Cooperative Month- ini an legal nga basaran hini nga mga aktibidades yana.

via mmp/CIO