TACLOBAN CITY – Puno hin kadasig, ini nga bata ha letrato in nakada na ha finger print scanning komo osa han mga proseso han ID registration han nagpapadayon nga National ID registration program nga proyekto han national government ipinaagi han Philippine Statistics Authority (PSA) ngan han City Government of Tacloban.

Ini nga registration center in nahimumutang ha Tacloban North City Hall Extension Office ha Brgy. 106 Sto. Niño nga gin-establisher ni Mayor Alfred S. Romualdez agud maserbisyuhan an mga taga Norte Tacloban kun diin nahimumutang an mga Yolanda survivors nga diri na madurohan han gastos pasahe ngan panahon ha pagkakadto ha sentro han siyudad.

Ha “ waiting area”, an mga nanay todo alalay haira mga bata para maka parehestro han libre nga National ID- pati pulahay pa (baby) nga anak gindara nala anay kay waray man magbabantay didto han ira balay.

Sumala kan Paul T. Opiniano, Supervisor han ID Registration, ha luyo han kadamo han napa rehestro, ira ginsisiguro nga nasusunod an mga Health Protocols, sugad han pagsul-ot han face mask, physical distancing ngan sanitation- diin hiya mismo an nagmamando hini haira Satellite Office.

Dida han Hunyo 15, 2021 an mga na edad hin 15 anyos tipa igbaw gintikangan an registration, samtang hini la nga bulan han Hulyo gintikangan an panrehestro han mga kabataan nga na edad hin singko (5) anyos tipag-ibaw. Live Birth certificate ngan valid ID an kumon nga requirements.

Ginkakarawat gihapon ha pagparehestro an mga nakakadto nala (walk-in) nga karuyag magrehestro- diin sumala pa kan Opinano, naabot hin 175 ka tawo an ira nairerehestro kada adlaw, Lunes tubtob Biyernes.

M. Padernos/CIO