Tacloban City (Jan 29, 2022) – Makaharadlok, makulba, kay masirom an dalan ngan makuri an pag-agi han mga motorista kay ruba-ruba na an kalsada tipasulod ha Greendale pabahay ha Norte Tacloban.

Pero yana, sugad han iginpatapod ni Mayor Alfred S. Romualdez nga damo an mga development projects nga nakahilira para ha Norte Taclopban, ini nga hilaba nga entrada han kalsada tipasulod ha Greendale Village ngan Guadalupe Heights magigin hayahay na an sitwasyon ha masunod nga mga adlaw.

Ha diri pala maiha, an kamasirum han dalan nasolbar na, kahuman igmando ni Mayor Alfred nga pamutangan ini maglamrag nga mga solar street lights- sugad hiton nakikita nga mga poste ha butnga ha kalsada.

An parte naman han ruba-ruba nga dalan, ha sumpayan han City government of Tacloban ngan han Tacloban City District Engineering Office (TCDEO-DPWH), sige iton trabaho yana hiton pag hingayad han kalsada.

Sumala han mga nakuhaan hin reaksiyon, hadton pagtikang han mga pabahay dida, mga pito (7) ka tuig na an nakalabay, ginsemento na ini nga kalsada, kundi han inagi-agi han mga truck nga naghahakot han mga construction materials ngan mga truck nga sulod gawas kay sige hakot han tubig, asya an nagin hinungdan nga naruba dayon an kalsada.

Halason pa ini nga lugar kay banwaon, nga danay haros mahitamakan an halas kay masirom kun gab-i ngan ruba-ruba pa an dalan, kundi yana dako an amon pasalamat kan Mayor Alfred nga malamrag na an dalan kun gab-i ngan gin-aayad pa gud an kalsada, siring hin mga nanay nga nagbabaktas.

Ha pag bisita han Tacloban City Information Office (TCIO) news team, nakita nga two lanes an dalan nga natutunga ipinaagi hin hilaba nga mini island. An two lanes in pareho mga rubaon nga asya an gin rereblocking yana ug hirani na mahuman.

M. Padernos/CIO