Tacloban City (Jan. 05, 2022) – Routine nga refresher orientation ngan values formation. Ini iton gin-aatenderan nga tunga hin adlaw kada Miyerkules nga aktibidad han mga parag-uma ha Norte Tacloban kahuman mag-eskwela han moderno nga pag-uma ha Pitahaya Farm ngan TESDA dida han nakalabay nga tuig.

Gindudumara ini ha PDRF Activity Center ha sulod han GMA ngan Habitat pabahay Community ha Brgy. 106 Sto. Niño. Nahibaroan tikang han mga tinaglawas han City Agriculture Office, yana nga adlaw Enero 05, 2022, gintikangan an Refresher Orientation basi diri mahingalimtan an mga nahibaruan dida han ira pag eskwela.

Samtang an Values Formation, panuyo hini nga magin maupay an relasyones han ira hugpo komo magkaurosa ha Pabahay Community ngan ha pag-uma. Magigin regular na ini nga buruhaton kada miyerkules, siring han mga trainer.

Ha kabug-osan, 50 ka tawo ini nga mga namag-aram han moderno nga pag-uma, kundi han yana nga adlaw, 21 la an naka attender kay may mga kabilinggan an iba, samtang an iba bag-o pala nga nagpa bakuna kontra covid 19.

Sumala kan “Marnell”, ngatanan hira may-ada na igin alutaga nga tuna didto han kanan City Government of Tacloban 13.8 hectares EcoFarm nga ira na yana gintikangan pag hawan komo pangandaman han pagtanom.

Dako an pasalamat han mga benepisaryo ha City Government of Tacloban ha liderato ni Mayor Alfred S. Romualdez nga deroderetso gud ini nga programa ha moderno nga pag-uma kay dako nga bulig han ira pagpakabuhi ha Norte Tacloban.

M. Padernos/CIO