Maabot 34 ka presinto ha bug-os nga nasod an naging kaparte han mock elections pangandaman han bubuhaton nga National and Local Elections ha maabot nga Mayo 2022. Duha ka presinto han siyudad han Tacloban an bulig han mao nga aktibidad, usa ha Panalaron Central School ngan usa ha Sto. Niño Elementary School. An tagsa-tagsa nga presinto amo in mayda ginpili nga 100 ka botante para magpartesipar han nasabi nga aktibidad.

An ngatanan nga botante umagi ha temperature check og contact tracing QR scanning ugsa makasulod ha ira presinto. May andam gihapon nga isolation room inkaso magpakita hin simtomas hin COVID-19 an usa nga botante kun diin pwede hiya makapadayon pagbotos. Ginlimitahan gihapon ha napulo ka lingkuran an sulod han presinto para mapatuman la gihapon an physical distancing.

Samtang, mayada naman gintudlok nga Emergency Accessible Polling Place (EAPP) para han mga burod, senior citizens og PWD kun diin mas pinasayon ngan komportable an ira pagbotos.

An panbotos para han mock elections ginbuhat kanina han alas ocho han aga kutob han alas dose han udto. Ha luyo han halaba nga pila tungod han mauran ngan panahon ngan pira nga paper jam han pira nga balota, waray dako nga aberiya an nasipatan han ginbuhat nga mock elections.

D. Ortega/CIO