Diri nala limitado ha mga senior citizens o mga bedridden an pagtatagdon han mobile vaccination, kundi upod na an hin-o man nga madaop ha ira ngan karuyag magpabakuna.

Ini in sumala kan Dr. Joedina B. Gumagay, Chief of Hospital hanTacloban City Hospital nga asya man liwat an Team Leader han Mobile Vaccination han City Government of Tacloban.

Pero gin klaro ini Dr. Gumagay nga ira liwat anay pinanginginano an kahimtang han panlawas hini kun kaangayan gud mabakunahan para likay hin anuman nga problema ha panlawas.

An pagkarawat na hin iba nga mga babakunahan ipinaagi han mobile vaccination in komo suporta han kan Mayor Alfred S. Romualdez ginhihingita nga humitaas an ihap han mga mababakunahan agud masiguro nga protektado an mga molupyo kontra COVID-19, siring ni Dr. Gumagay.

Ini nga mobile vaccination nakadto gud ha mga barangay para didto na mismo bakunahan an mga senior citizens nga diri na nakaka kadto ha vaccination center, labi na kon bedridden na ini- o di man ngani an iba nga waray paagi nga makakadto ha mga bakunahan.

Samtang, nanawagan hi Mayor Alfred S. Romualdez ha mga molupyo han Tacloban nga kumadto na ha Mega Vaccination Center ha Astrodome ngan magpa bakuna kay damo an vaccine yana ngan bangin lugod ighatag ngadto ha iba nga lugar kun diri magagamit dinhi ha aton siyudad.

Dida hiton Nobyembre 05, 2021 (Biyernes) upod na nga babakunahan an mga kabataan nga nag eedad 12 ngadto ha 17 anyos, siring ni Mayor Romualdez.

M. Padernos/CIO