Tacloban City, Philippines – “Tikang han akon ka bata, waray gud kami dinhi ha Cabalawan makatilaw hin tubig tikang ha LMWD. Puro la tikang ha bomba ngan bubon”.

Ini an pulong ni Brgy. Kapitan Lito P. Balangbang han Brgy. 97 Cabalawan ha Norte Tacloban. Yana hi Kapitan Balangbang in sobra 50 anyos na an edad.

Kundi yana, siring ni Kapitan, hirani na an kamatuoran nga hira pirmi na makakagamit hin tubig tikang han ira gripo ha kada balay, ha panahon nga matima na ini nga paglinya han tubig ha ira barangay.

Ini yana nga gintratrabaho, siring ni Kapitan, in para na han mga orihinal nga mga molupyo han Brgy. 97, kay iba man la an para han mga pabahay.

Sumala kan Kapitan Balangbang, ha iya pakighimangraw kan Engr. Cabriana han PrimeWater Leyte Metro ( anay LMWD), magbubutang nala anay hin kumon nga public faucet o gripo ha ira main barangay komo temporaryo nga surok han tubig, samtang gintratrabaho an mga linya han tubo ha ira barangay.

Sige na yana iton sinukol-sukol han mga taga PrimeWater ha mga lugar kun diin iplaplastar an mga tubo, ngan masunod an panlinya tikadto han kada tagsa nga balay upod na an kontador.

Ha ngaran han mga taga Barangay dako gud an pasalamat ni Kap. Balangbang ha City government of Tacloban ngan PrimeWater para hini nga maupay nga development haira barangay.

M. Padernos/CIO