Positibo an nagin kabatunan han publiko han panawagan ni Mayor Alfred S. Romualdez nga magpabakuna na mga molupyo han Tacloban labi na an kabataan nag eedad 12 – 17 anyos samtang aada damo pa an supply han bakuna.

Yana nga adlaw, November 5, ha pagtikang han mas pinakusog nga panbakuna, mga kabataan an bumida ha Tacloban City Hospital kun diin mismo an Chief of Hospital Dr. Joedina B. Gumagay an nagmamando han hapsay nga proseso han pagbakuna.

Tikang pa dida han pagtikang han pandemya, plastado na an mga proseso han hospital, sanglit matalunoy la an kanan yana nga adlaw panbakuna kun diin an mga kabataan upod an kag-anak para alalayan labi na an mga hadlokon hin dagum.

Siring ni Dr. Gumagay, 167 la anay an babakunahan yana nga adlaw, ngan buwas, November 6, liwat an 168 para makumpleto an ira alokasyon nga 335 doses tikang ha DOH.

Mahinunumduman nga iginpahayag ni Mayor Romualdez nga kun makab-otan na han Tacloban an herd immunity o hitaas nga ihap han mga nabakunahan, pwede na hul-os nga maabrehan an siyudad para han dirodilain nga mga negosyo para mahibalik an kama baskug han ekonomiya han Tacloban City nga sentro han rehiyon 8.

M. Padernos/CIO