Nagpasabot an usa nga opisyal han Tacloban City Fish Port ha mga nagbabaligya o naangkat hin mga isda ngan iba pa nga produkto nga tikang ha dagat nga tikang ha gawas han syudad nga umagi anay ha ira buhatan para dire mamultahan.

Ginpapatuman man gud han opisina an Ordinance No. 2015-12-19 o an “Ordinance Governing the Use, Management and Operation of the Tacloban City Fish Port, Prescribing Fees and Charges, and for other purposes.” Panoyoan han ordinansa nga magin hapsay, sistematiko, ngan sentralisado an fishing industry han syudad, labot la han pagsiguro nga presko ngan malimpyo an mga produkto nga naabot ha mga merkado. Sanglit an tanan nga fishing vessels, bulk fish carriers, wholesale fish suppliers ngan dealers ginmamando nga umagi ha fish port han syudad nga namumutang ha Quezon Boulevard.

Kasumpay hine, naglilibot an mga personales han fish port han mga talipapa ngan Merkado han syudad para siguraduhon nga mayda kaangayan nga permit an mga nagbabaligya hin isda ngan iba pa nga produkto nga tikang ha dagat.

Durante han ginbuhat nga operasyon han grupo kakulop, Martes, Marso 14, upat (4) nga mga magbaraligya hin isda nga nagtitikang ha Calbiga ngan Marabut, Samar an nahisabotan nga waray umagi ha fish port, sumala kan Ben Pido.

Ginsumat gihapon ni Pido durante Oras Han Tacloban Radio Program han City Information Office, nga gintiketan an upat han mga personales han fish port an upat, ngan gin-abisohan nga sumunod han mga aludayday han city ordinance.

An mga penalidad han mga masupak han fish port ordinance amo an masunod: P2,000 para han first offense, P4,000 para han second office ngan P5,000 han third offense.

#CIOUpdates

#FishPort

(via H.J. Roca upod an report ni E.A. Lagahit/CIO)

Photo: E.A. Lagahit