Tacloban City, Philippines (2.26.21)– Andam na iton babalhinan nga mga pabahay ha Norte Tacloban para hiton mga manhihilis-ig nga mga pamilya hiton nagpapadayon nga demolition ngan expansion han DZR Airport ha San Jose Tacloban.

Sumala hiton mangulo han City Housing and Community Development Office Ted Jopson, 498 units ini nga mga balay para haira nga nahimumutang ha Aeroville ha Brgy. 106 Sto. Niño ha Norte Tacloban.

Ginklaro ni Jopson nga diri ini kanan Yolanda project nga mga pabahay kundi kanan Department Of Transportation (DOTr) komo bulig han gobyerno ngada han mga apektado nga mga pamilya hini nga airport expansion.

Kanan City government of Tacloban iton tuna nga gintindogan hini nga Aeroville, samtang DOTr iton nag gagasto ha proyekto, National Housing Authority naman an developer hini nga proyekto, siring ni Jopson.

Dugang pa ni Jopson, an water connection ngan power installation iton padayon liwat yana nga gintratrabaho agud hul-os na nga maukyan ini nga pabahay.

Han yana pala nga simana, gindumara an meeting para na han pag raffle hini nga housing project ha Aeroville nga gin atenderan han mga taga City Mayor’s Office, National Housing Authority, City Social Welfare and Development Office, Commission Human Rights, Department of Transportation, Civil Aviation Authority of the Philippines ngan han tikang ha buhatan ni City Councilor Aimee D. Grafil- komo Committee Chairman on Social Services ha konseho.

May- ada pa mga proseso nga gintutuhay yana ha pag-instalar han tubig ngan kuryente nga gintututukan han siyudad para dagmit maibalhin an mga apektado- samtang nagpapadayon an pagpahilapad han airport, pahayag pa ni Jopson.

M. Padernos/CIO