Tacloban City (7.24.21)—Damo hin duro an karuyag magpabakuna kontra covid-19 gamit an Johnson & Johnson vaccine. Ini in ginbubuhat ha duha nga Robinsons Malls, ha Marasbaras ngan ha Abucay—pero diri ini ngatanan mga taga Tacloban. An iba taga iba nga bungto gawas han siyudad.

Ini an ginklaro ni Mayor Alfred S. Romualdez han binuhat nga Press Conference kaupod an mga taga DOH.

Para gud la han mga taga Tacloban an supply han bakuna ha siyudad. Sanglit para masiguro nga mga Taclobanon an mababakunahan ha ilarom han kategoriya nga A2 ngan A3, diri na tutugutan an mga mapila nga diri mga Taclobanon. Hira in sasagdunan nga umiwas para an mga kaangayan la pumila an aada, agud magin madagmit an panbakuna, ngan mahikab-utan an ginhihingita nga kadamuon han angay mabakunahan nga mga Taclobanon.

Nanawagan hi Mayor Romualdez hin kooperasyon ha publiko nga magin hapsay an proseso han panbakuna, ngan diri na magpirit pagpila an mga diri Taclobanon, kay diri gud hira maaatenderan.

Gin sasagdunan liwat an mga magpapabakuna nga magdara han ira kalugaringon tubig, pagkaun, ballpen, ID, facemask, face shield ngan QR code nga ira pagkikinahanglanun samtang napila para mabakunahan.

M. Padernos/CIO