Mapaso nga ginkarawat ni Mayor Alfred S. Romualdez an mga bisita ha Tacloban nga delegasyon han Ministry of Human Settlement and Development tikang ha Bangsamoro Autonomous Region in Muslim Mindanao (MHSD-BARMM) nga ginmangulohan ni MHSD Minister Hamid A. Barra.

Tinawag han delegasyon nga Cross- Learning Visit an ira pag bisita ha Tacloban, kay karuyag nira mahibaro han mga mag-upay nga programa han siyudad partikular bahin han housing projects ngan recovery strategies and programs dara han madagmit nga pakabawi han Tacloban tikang han kalamidad nga gin-agian panahon han Super Typhoon Yolanda dida han Nobyembre 08, 2013.

Kasugbong dida hini nga Cross- Learning Visit an mga taga National Housing Authority (NHA) ngan Catholic Relief Service (CRS) nga mga kasugbong liwat han gobyerno ha mga housing projects ngan recovery programs.

Ha pagyakan ni Mayor Alfred S. Romualdez, iya iginpaangbit an iya mga nagin pamaagi para dagmit nga makatindog an gobyerno han Tacloban ngan han mga kumonidad- ngan osa na hini an dagmit nga pag-abre han mga negosyo para dungan nga mabuhi an mga tawo ngan han ekonomiya han gobyerno.

Nagpatapod pa hi Mayor Romualdez kan Minister Barra nga andam hiya bumisita ha Marawi City o diin nga karuyag nira kun diin hiya in matutok bisan duha ka adlaw nga harampang para la niya hul-os nga mailatag ha MHSD-BARMM an mga estratehiya nga iya iginpatuman ha Tacloban para han housing ngan recovery programs.

Dako an kalipay ni Minister Barra hini nga pahayag ni Mayor Romualdez, nga sumala haiya an ira upat ka adlaw nga paghunong ha Tacloban (Sept. 21-24) in nagin puno hin hibabroan nga ira magagamit nga mga ideya ha pagtindog hin mga housing projects ha Marawi City- pati na an pagpatuman han nagpapadayon nga pagtindog balik han ira siyudad nga hul-os nahirusdak dida han bumutho an gyera ha butnga han mga rebelde nga ISIS ngan pwersa armada han gobyerno hadton Mayo 23, 2017 o sobra upat (4) naka tuig an nakakalabay ngada yana nga 2021 na.

Komo simbulo han kamagsangkay han duha nga siyudad, Tacloban City ngan Marawi City, nagbalyo-ay hira Mayor Romualdez ngan Minister Barra hin mga regalo.

M. Padernos/CIO