TACLOBAN CITY ( Oct. 11, 2021) – May yaman (karikohan) ha Gulayan (umhanan hin mga utanon). Dida hini kinuha an ngaran nga GULAYAMANAN nga nahimumutang ha Norte Tacloban han siyudad.

Hi Gerlad Abrogar (naka pula), usa han mga magbakud nga kasugbong han City Government of Tacloban, partikular ha AeroVille Pabahay, Brgy. 106 St0. Niño, kun diin nahimumutang an 13.8 hektarya nga EcoFarm nga nakakasakop han GULAYAMANAN.

Proyekto ini nga igin plastar ni Mayor Alfred S. Romualdez agud nga tugwayan ngadto hin moderno nga pag-uma an 23 nga Farmers Organizations ha Norte Tacloban ha panuyo nga mas magin produktibo an pag-uma nga magigin dako nga bulig ha paghatag hin pagkaon ha mga tawo hasta ha merkado.

Siring ni Gerlad Abrogar, Program Officer han GULAYAMANAN, haira 50 ka tawo nga kaapi, an 20 hini yana in nagpapailarom hin Urban Gardening Training ha TESDA, komo usa nga program nga iginpapatuman ni Mayor Alfred Romualdez ha pakigbinuligay han TESDA, Pilipinas Shell, ngan East West Foundation ipinaagi han Managing Director Ma. Elena Van Tooren.

Ha Oktubre 20, 2021, magtatapos an 29 diyas nga training ha TESDA han una nga 20- ngan isusunod liwat an nahbibilin nga iba, siring ni Abrogar.

Agud masiguro nga nababaton dayon an mga kinahanglan haira pag-uma, aada pirme hi Mrs. Ruth Ramirez, Coordinator han City Government ha Norte Tacloban, nga gintuinan ni Mayor Alfred nga tutukan an proyekto ug ipadangat dayon haiya (kan Mayor) an mga kaangayan aksiyunan dayon.

Mga Tarong, Karobasa, Siling Labuyo, kamatis, ngan Harang iton pauna nga nakaprograma pagtanumon dida han kahuigluagan nga mga umhanan ha sulod han GULAYAMAN, payag han ni Abrogar.

Ha ngaran han iya 50 ka tawo haira grupo, ginpasalamatan ni Abrogar hi Mayor Alfred Romualdez haiya padayon nga pag bulig ha sector han mga parag-uma ipinaagi han iya mga programa.

M. Padernos/CIO