Love. Ini an nagin susi ha madagmit nga pag tindog balik han Tacloban kahuman ini mahilaprak dida han super typhoon Yolanda han Nobyrembre 08, 2013- o walo ka tuig na ngada yana nga Nov. 8, 2021.

Ini an nagin sentro han mensahe ni Mayor Alfred S. Romualdez yana nga adlaw han binuhat nga paghinumdum han mga Taclobanon nga namatay hadto nga naglabay nga kalamidad.

Sumala kan Romualdez, dara han gugma han iba-iba nga mga nasud bumuhos ha Tacloban an ayuda nga nagin dako nga bulig han madagmit nga pakabawi tikang han kakurian. Ha mga tawo naman ha Tacloban, gugma gihapon an naipakita ipinaagi han pag binuligay han kada osa nga nagkukuri an kahimtang.

Sanglit dida hini, ginpasalamatan otro ni Mayor Alfred an international community nga bumulig ha Tacloban – bagay nga diri hingangalimtan, pati na an mga Taclobanon nga tumapod han iya liderato han City government of Tacloban panahon han Yolanda.

An pamilya Marcos, dako gihapon an nagin bulig ha Tacloban, sanglit man, yana nga adlaw hi presidential candidate Bongbong Marcos an pinakadako nga bisita dida hini nga paghinumdum binuhat mismo ha Yolanda mass grave kun diin mapaso hiya nga gintapo han mga tag suporta.

Ha pagyakan ni BBM, gindayaw niya an pagigin magbakod nga tawo han mga Taclobanon ngan bug-os nga rehiyon, kay umilob han makalilisang nga lapingka han Yolanda ngan madali nga nakatindog balik ha mga rapadapa para ipadayon an pag kinabuhi hasta ngada yana.

Nanawagan hi BBM hin pagkaurosa kay ini in maupay nga pundasyon para han mga tiarabot nga mga ayat ha kinabuhi.

Lakip nga nagtambong dida hini nga Paghinumdum 2021, hira anay City Mayor Cristina Gonzales Romualdez., Cong. FM Romualdez, Tingog Rep. Yedda Marie K. Romualdez ngan Raymund Romualdez, ngan mga City councilors han siyudad.

Pinangunahan nira BBM ngan Mayor Alfred an paghalad han bukad dida han Memorial Marker para han sobra duha ka yukot nga naawat an mga kinabuhi hadto nga delubyo han 2013.

M. Padernos/CIO