Tacloban City (Sept. 03, 2021) –Magkasugbong an City government of Tacloban ngan han Rotary Club of Kandaya ha oosa nga tinguha nga matagan hin edukasyon an mga kabataan samtang hira in aada pa ha linghod nga panuigon.

Sanglit yana nga adlaw, pormal nga gin-abriha an Mini Library and Community Center nga proyekto ha Norte Tacloban nga nahimumutang ha Habitat Pabahay ha Brgy. 106 Sto. Niño. Kaupod ni Mayor Romualdez an mga kaapi han Rotary Club of Kandaya nga nanhatag han mga Learning Materials ha mga kabataan.

Kadungan han pag abri han mini library, nagkaada liwat hin Childrens’ Community Pantry ha sulod han North Park diin an mga kabataan in gintagan hin mga tsenilas, pagkaon ngan kadugangan nga learning materials.

Ha mga masunod nga panahon, may-ada pa sugad nga proyekto nga pag aabrihan ha iba nga mga pabahay ha Norte Tacloban agud nga an kabataan in may-ada pag eestudyohan para han ira edukasyon.

Ha mga kabataan nga imbetado ha pag-abri han library- hira in napamakianhan kun karuyag nira magin ano pagdako nira, Upat (4) an karuyag magsundalo, 3 magin pulis, 4 magin doctor, 1 magin Architect- nga ira maabot kun magtatapos hira han pag eskwela gamit an pundasyon nga edukasyon tikang han mini library.

Gindayaw ngan ginpasalamatan ni Mayor Alfred S. Romualdez an mga kaapi han Rotary Club of Kandaya nga padayon nakikipag binuligay haiya administrasyon ha dirodilain la nga proyekto nga dako an bulig ha mga kumunidad.

M. Padernos/CIO