Direktiba ni Mayor Alfred S. Romualdez nga pakusgon ngan damoon pa an mga livelihood oppurtunities ha mga tawo labi na ha mga relocation sites ha Norte Tacloban.

Ini an nagin pahayag ni Mrs. Ruena M. Mate, mangulo han City Cooperative Development and Livelihood Asssitance Office (CCDLAO) haiya pagyakan han binuhat nga Closing Ceremony han Livelihood Skills Training parte hin ‘Herbal Soap Making, Ear Acupuncture And Basic Tuina Massage’ ha Brgy. 106 Sto. Niño kanina han aga.

Treinta y Uno (31) nga mga Youth Leaders, mga nanay ngan usa nga Tatay an nagtapos ngan kumarawat han ira certificate of Training nga gindumara dida pa han Agusto 24-25, 2021 kundi nagpabalay pa hira hin usa aka bulan tikang mahuman an training para makab-ot an Curing Period han ira pinanhimo nga mga Herbal Soap- nga ira pinakadamo nga produkto dida han ira Training- sanglit han yana pala nga adlaw gindumara an ira closing program.

Ngatanan han mga Pabahay ha Norte Tacloban may partisipante dida han Training ipinaagi han mga Youth Leaders- nga yana may-ada na baligya nga mga Herbal Soap haira tagsa tagsa nga lugar nga maitatanding na ha mga commercial beauty soap.

An 66 anyos nga hi mana Lucena S. Coritana, ngan hi Valeriano A. Arguelles, an mga pinaka edaran na nga nag pahimulos han training- nga sumala pa haira basta parte ha pakabuhi maningkamot gud hira kay kinahanglan.

Sumala pa han mangulo han CCDLAO, diri natatapos dida hini nga Closing program an pag ayuda han siyudad ngada hini nga mga nagmagtapos han paghag-id kay tatagan pa hira hin libre nga mga materyales para magpadayon panhimo han Herbal Soap- ngan ha maabot nga Oktubre 21, 2021, Packaging ngan Labelling Training naman liwat an bubuhaton- samtang an CCDLAO in mabulig ha marketing o pag baligya han mga produkto para mas makilala ngan damo an pumalit.

Kasugbong han City government dida hini nga Training an Team tikang ha Philippine Institute of Traditional and Alternative Health Care (PITAHC) nga gin mamangulohan ni Miss Evelina M. Juaban, ngan han Tacloban City Hall North Extension nga gin mamangulohan han Coordinator Mrs. Ruth Ramirez.

An mga representante han kada sector han kabataan ngan mga nanay, dako gud an pasalamat nga hira in nakag training kay sumala pa haira dako ini nga bagay para han ira pagpakabuhi- diin ira ginhihinaot nga umusenso ini yana nga ira gintitikangan nga nesgosyo.Ha dayuday, siring ni Mrs. Mate, ini nga grupo nga namag gradwar yana in ig oorganisar komo osa nga Kooperatiba basi mas makakuha hin dako nga pundo tikang ha gobyerno para han ira mga livelihood projects.

M. Padernos/CIO