Gin-abrihan para han mga Motorcab for Hire (MCH) an Mangonbangon Bridge ha Paseo de Legaspi yana nga adlaw. Gamit an usa nga operational nga lane han padayon nga ginhihingayad nga four-laned nga tulay, hapsay nga nakakaagi na an mga drivers han MCH ngan single nga motor dinhi tikang kanina han aga.

Sumala kanda Ric Balais ngan Raul Mendoza, mga traffic enforcers han TOMECO, dako an diperensya han dalagan han trapiko yana nga adlaw mahitungod nga naibanan an paghuroot han mga sarakyan didto han tulay ha may Seawall.

Nagpasalamat naman hi Danilo Matienza, usa nga MCH driver, hini nga bag-o nga development han nasabi nga tulay kay sumala ha iya, nakaupat hiya magliwan hin ‘bearing’ han iya sakyanan tikang han temporaryo nga iginpasara an Mangonbangon Bridge mahitungod han kamakuri han dalan didto han usa nga tulay.

“Nagpapasalamat ako kan Mayor Romualdez han iya paniguro nga mapadagmit an pagtrabaho hini nga tulay. Yana masmadagmit it biyahe ngan diri na kukurian iton amon mga sarakyan pag-agi hin mga batsihon,” siring ni Matienza.

Samtang, nakatalaan paagion han nasabi nga tulay tinikangan sunod nga Lunes, Nobyembre 29, an mga multicab, kun diin mahitungod hini, ginlalauman nga masmag-iimprove pa an dalagan han trapiko.

RPA-Cablao/CIO