Malipayon nga pasko – ini an ginpatapod ni Mayor Alfred Romualdez ha pag-abri han Tacloban City Convention Center komo Mega Vaccination Center, yana nga adlaw. Kaupod han pag-abri hini amo an pag-tikang han pangarawat han “walk-ins,” sanglit abri ini para han ngatanan nga kwalipikado nga Taclobanon para han bakuna, basta la may dara nga valid government-issued ID o Barangay Certificate.

Sumala kan City Health Office OIC Dr. Gloria Fabrigas, ini an “ideal” nga bakuna center nga makaka-akomodar ngan makakapanbakuna hin maabot 5,000 katawo kada adlaw, labot la kun Domingo o holiday.Yana nga adlaw, maupay an kalingkod ngan paghulat han mga recipients han syahan nga dose han Sinovac tungod kay haluag ngan diri mapaso ha sulod han convention center.

Mahitungod nga aabrihan na an iba nga mga establishments han duha nga malls nga naging opisyal nga vaccination centers han syudad, ginhap-id han amay han syudad an nasabi nga plano tikang pa han bulan han Mayo, kundi yana la natuman han pagkamay-ada hin supisyente nga supply han bakuna ngan “logistics.”

Samtang, iginpahibaro ni Mayor Romualdez nga aada hin 75,000 nga mga Taclobanon an mababakunahan ugsa umabot an Nobyembre 15. Ini in ha butnga han paningkamot han City Government of Tacloban nga makab-ot an “herd immunity” ha paghingyap han Local Chief Executive nga maging abri an syudad para ha ngatanan nga kwalipikado ngan gusto magpabakuna dinhi.

Kaupod ni Mayor Romualdez hi Hiraya President Raymund Romualdez han pag-asikaso ngan panginano han “mega vaccination site.”

L. Jopson/CIO