Tacloban City ( 7.18.21) – Padayon nga naghahatag hin libre nga tubig an City Government of Tacloban ngadto han mga pabahay ha Norte Tacloban samtang sige pa an trabaho han permanente nga supply han tubig ngadto hini nga dapit ipinaagi han LMWD.

Ha mando ni Mayor Alfred S. Romualdez, mga water tanker han City General Services Office an naghahakot han libre nga tubig tikang ha City Government nga iginbubutang ha mga tangke para makagsalud an mga molupyo. Waray duda nga libre an igindedeliver nga tubig tikang ha City Government, kundi, dida mismo han mga pabahay, an mga Cluster Officers in nagsusukot hin talagudti nga bayad tikang han mga nag-aalog han han tubig.

Ha Guadalupe Heights, pananglitan, siring ni Ronald Sabela- Presidente han Cluster 13, nagsusukot hira hin tag-piso kada water jug, ngan ini nga ira ginsusukot nga talagudti- gintitirok nira pan maintenance han pagpapalimpyo han tangke o pagliliwan kun naruruba an gripo, hose o tubo. An tag piso kada water jug nga sukot in aprobado nira komo mga opsiyales han Cluster, dugang nga pahayag ni Sabela. An mga water tanker han City government nadul-ong han tubig haira lugar kada Martes, Huwebes ngan Sabado, siring ni Sabela.

Para diri malako han tubig nga hatag han siyudad, an mga molupyo hini nga dapit may-ada iba pa nga surok hin tubig gamit an mga jetmatic pumps para han panlimpyo haira mga balay.

Ha iba nga mga pabahay, libre gihapon an igindedeliver nga tubig tikang ha city government- pero an mga cluster officers, homeowners officers, o an barangay na mismo an nagsusukot hin talagudti para gamiton ha maintenance han water facilities. Samtang, ha panahon nga an mga balay in direkta na makonektaran han tubig tikang ha LMWD hira in direkta na liwat nga magbabayad han ira kunsumo didto mismo han LMWD.

M. Padernos/CIO