Tacloban City ( Aug. 27, 2021) – Kooperatiba na kami. Ini an puno hin kalipay, kadasig ngan pagpasalamat ni Mrs. Rosalia Ramirez, Production Manager han Tacloban North Producers Cooperative (TNPC) han Brgy. 106 Sto. Niño ha Norte Tacloban samtang iginpaparayaw an ira Certificate of Registration tikang ha Cooperative Development Authority (CDA).

Agusto 04, 2021 han hul-os nga magin kooperatiba ini nga grupo, nga 35 ka tawo, ha bulig han City Government of Tacloban ha ilarom han liderato ni Mayor Alfred S. Romualdez. An Tacloban North Producers Cooperative (TNPC) in nahimumutang ha Multi Purpose Livelihood Center (ha GMA Kapuso ngan Habitat pabahay) ha Brgy. 106 Sto. Nino.

An City Cooperative Development and Livelihood Assistance Office (CCDLAO) nga ginmamangulohan ni Mrs. Ruena “Ate Weng” Mate an direkta nga nag nag gigiya hini nga kooperatiba komo osa han mabakud nga programa han City Government of Tacloban.

Kaparte ini nga kooperatiba ha pag surapo han Covid-19 pandemic komo hira an naghimo han mga Personal Protective Equipment (PPEs) o cover-all suits ngan mga face masks nga gingagamit han mga health workers han City government nga nag reresponde ha butnga han pandemya.

Mahitungod nga duro hin ka produktibo ini nga kooperatiba, han yana nga Agusto 25-27, 2021, naipasundayag hira ha Eastern Visayas State University (EVSU) Trade Fair Exhibit kun diin dirodilain nga ira mismo hinimo nga mga produkto an ira igin display/baligya sugad han facemasks, ulonan, punda, pot holders, paspasan, kurtina, sabon, wallet, coin purse, bags ug hin damo pa nga iba.

Nahiuna hini, iginpahayag ni Mrs. Mate, mangulo han CCDLAO, nga may-ada pundo an siyudad para han mga kooperatiba nga pwede ma utang (loan) agud makag pundar hin dako nga negosyo komo surok han ira pag pakabuhi.

M. Padernos/CIO