Tacloban City (Jan. 19, 2023)- Nakabalik na an mga contractors pagtrabaho pamutang han mga tubo o pipe-laying para han mga linya han tubig ha siyudad han Tacloban mahitungod nga humuraw-huraw naman. Sumala kan LMWD General Manager Ronnie Cornico, dida han mga nakalabay nga semana, waray gud katuhayan han trabaho dara han uuran- ngan ini an rason nga nadelatar ini nga proyekto.

Sumala kan Cornico, yana nga bulan han Enero, pagmamalahumanon ini kun magdirudiretso na an pagsirak.

Ha yana, an water district in may-ada duha nga planta nga nagsu-supply han tubig ha siyudad, nga bisan mauran o maraot an panahon akos hini mag hatag hin tubig ha mga konsumedor.

An dako nga reservoir ha Brgy. 39 Calvary Hill, siring ni Cornico, in ira na natestingan ug maupay ini an paawas han tubig ngadto ha northern barangays. Ginhuhulat nala an gin-order nga controller, ngan mahitaud na ngani ini, hul-os na nga paggagamiton an reservoir. Ini in kinikita nga magigin dako nga bulig ha paghatag hin maupay nga pressure ngan supply han tubig ha Norte nga dapit han siyudad.

An mga gate-valve naman ha may government center ha Palo, Leyte in nakatalaan na panliwanan para maisumpay na ini ha mga linya ha San Jose- Manlurip nga dapit nga madalagan liwat ha bug-os nga siyudad.

Sumala pa kan Cornico, nagtitikadamo iton namamag apply hin water connection ha Norte Tacloban kay nagtitikaupay na an supply han tubig tikadto hini nga mga dapit kun diin nahimumutang an mga pabahay.

May-ada mga public faucets ha mga pabahay kun diin aada kukuha an waray pa mga water connection, kundi siring ni Cornico, ha panahon nga ngatanan na matauran hin tubig, sisirahan na an mga public faucets.

Para mas mapakusog pa an supply hin tubig ha nagtitikadamo nga panginahanglan ha siyudad, may-ada pa gintratrabaho nga osa nga planta ha Pastrana Leyte nga maghahatag liwat hin tubig ha bug-os nga siyudad han Tacloban.

mmp/CIO