Tacloban City (Oct. 13)– Treinta y cinco (35) nga Day Care Centers iton pagtitindogon ha siyudad han Tacloban ha sunod nga tuig, 2024, nga bubutangan liwat hin treinta y cinco (35) nga mga Day Care workers.

Ini an iginsumat ni Mayor Alfred S. Romualdez panahon han iya pagyakan dida han mass induction han mga bag-o nga nagkapipili nga Day Care Parent Committee Officers nga kadungan han Acquaintance Party nga gindumara kakulop, Ocktubre 12, ha Tacloban City Astrdome. Gintambungan naman ini han mga kag-anak upod an mga day care pupils nga pinangunahan ni City Social Welfare Officer Fe Chona A. Bahin.

Sumala kan Mayor Romualdez, ini in para mas damo pa nga mga kabataan iton makatagamtam han serbisyo han daycare center nga mahatagan hin edukasyon samtang gudti pa (early education.)

Samtang, ginhangyo naman han alkalde an bulig han mga kag-anak nga mga hindadabihan nga kaestoryahon an ira mga anak nga diri na bumulig hini nga nagpapadayon nga grupo-grupo hin mga estambay nga nagdadalan hin sige-sige nga riot ha Norte Tacloban.

Ini nga problema, siring han alkalde, diri maaakos kun pasasagdan la an pulis para trabahoon ini, sanglit kinahanglan an bulig han tagsa-tagsa nga kumunidad labi an mga kag-anak.

Para naman mamay-ada lugar nga pagpapahalibwayan han mga kabataan ipinaagi hin paugnat ha kusog , usa nga Sports Complex ha Norte Tacloban iton nakatalaan pagtindogon, dugang ni Mayor Romualdez.

#CIOUpdates#CSWDO#EarlyChildDevelopmentProgram#TaclobanCity

via mmp/CIO

photos:knapala/CIO