Usa an Tacloban City han mga nakiusa han bug-os nga kalibutan pagselebrar han International Women’s Day. Gintikangan hin usa nga motorcade, tumambong an durudilain nga buhatan han LGU, mga eskwelahan, ngan iba pa nga ahensya sugad han DepEd Tayo Tacloban City, BFP, AFP, BJMP, NBI, HPG, ngan Tacloban City Police Office.

Nagtapos an motorcade ha Tacloban City Convention Center (Astrodome) kun diin nagkaada hin halipot nga programa. Presente dinhi hi Konsehala Aimee D. Grafil, Chairperson han Committee on Gender and Development, nga naging tinaglawas ni Mayor Alfred S. Romualdez diin ginpaangbit niya an importansya han pagkilala han waray pagkakapoy nga pakigbisog han kababayin-an han ira mga katungod.

Samtang, sulod an selebrasyon han International Women’s Day ha pagobserbar han National Women’s Month nga may tema nga “WE for gender equality and inclusive society.” Sumala kan Hedeliza P. Ramos, Population Program Officer III han Tacloban City Population Office , diri la an kababayin-an an an gintutudlok han pulong nga “WE” dida han tema kundi an mga kaapi han ngatanan nga gender. Pag-aghat niya, magburublig para makab-ot an patas ngan inklusibo nga pagtratar ngan pagrespeto han ngatanan nga gender o sexual preference. Dugang pa ni Ramos, padayon an paniguro han lokal nga pangobyernohan han Tacloban para maimplementar an mga programa nga may kalabutan ha gender and development.

DOrtega

KNapala/MMenosa/ City POPCOM

#InternationalWomensDay

#TaclobanCity

#CIOUpdates