Tacloban City, Philippines (3.30.21)- Dako an pasalamat han mga taga Norte Tacloban han binuhat nga Imee Kadiwa- Brgy. Baratillo ha Brgy. 105 San Isidro (Suhi) han siyudad nga gintikangan kanina pa han aga ha St. Francis Village Gymn.

“Nalilipay kami nga nagkamay-ada hin sugad hini kay diri na kami makadto ha downtown, ngan bagsak presyo pa. Nagpapasalamat ako han akon higugmaon nga Senador Imee Marcos nga nagkamay-ada hini dinhi,” siring hin usa han mga mamaralit.

Consumers o mga kunsomohon ha mga panimalay an mga paninda nga gindara han Puregold dida hini nga Brgy. Baratilyo nga gindaraop han mga taga Norte Tacloban.

Siring liwat ni mana Norma Lagarto han St. Francis Village 2, maupay gud ini nga ginbuhat han siyudad ipinaagi kan Mayor Alfred S. Romualdez ngan Sen. Imee Marcos kay dako nga bulig haira.

Mga paninda ha iya sari-sari store an pinanmalit ni Mana Norma, nga sumala pa ha iya makakadako dako hiya hin ganansiya kay dako liwat an deskwento han iya mga napalit.

Organisado ini nga Brgy. Baratilyo nga sumapayan han City Government of Tacloban, Puregold ngan buhatan ni Sen. Imee Marcos, kay may TOMECO nga nagmamando han trapiko, ginsusunod an social distancing, ngan iba pa nga mga health protocols sugad han hand sanitation ngan pagsul-ot han facemask.

M. Padernos/CIO