Tacloban City (Sept. 09, 2021) – Susuratan han City government ipinaagi han City Disaster Risk Reduction and Management Office (CDRRMO) an nagtatag-iya hin usa nga bodega ha Brgy 105 Suhi nga gin-aalegar asya an nag sarop han kanal nga aawasan kunta han tubig tikang ha bukid ngan ha kalsada ngadto han mga sapa panahon hin mga tag-uran.

Ini in sumala kan CDRRM Officer Brando Bernadas, kay siring niya haira pag inspection ira nakita an usa nga kanal nga gin sarop rason nga pumundo an tubig ha kalsada nga nagdurot han baha dida han national road.

Dugang pa ni Bernadas, magbubulig hini an City government ngan han Department of Public Works and Highways (DPWH) mahitungod nga national road ini nga dapit.

An ginbuhat han CDRRMO para humubas an tubig baha ha kalsada, ira gin kabkaban anay ha ligid han kalsada para la makadalagan an tubig ngadto ha sapa, siring Bernadas.

Mahinunumduman nga dida han aga han Septyembre 07, ginatusgatos nga mga motorista an kinurian makaagi dida hini nga dapit han Brgy. 105 national highway dara han abot tuhod nga tubig baha.

M. Padernos/CIO