Hira nga unom (6) an bag-o nga napili nga mga opisyal han GMA- Habitat (G-HAB) kahuman han binuhat nga Election of Officers yana nga adlaw komo hira in naka usa na ka tuig nga organisasyon.

(Tuo- Wala) Pres. Emelita C. Olvis; V-Pres. Elisa G. Isanan; Sec. Rowena I. Ogario; Treasurer Tita Lapiz; Auditors Milagros M. Araza ug Antonieta A. Santos.

Septyembre 15, 2020 han magtikang an ira katig-uban nga matatawag “Women-Power” kay ngatanan kababayin-an an 24 nga mga kaapi hini.Gin-uuma hini nga katig-uban hin kababayin-an an 2,000 metros kwadrado nga tuna ha Habitat Village, Brgy. 106 Sto. Niño, nga yana puno hin dirodilain nga mga utanon.

Sugad hiton makikita ha mga litrato, mga Senior Citizens na iton iba hini nga na edad na hin tag 65 anyos–kundi aktibo pa nga nag-uuma komo surok hin talagudti nga hiagi hin salapi.

Siring ni Imelita C. Olvis, nga utro napili komo presidente han G-HAB, ha kada nira harvest season hira nga 24 ka miyembro in nakakagbabhin hin tag sobra PHP 500 tikang han hira pagbaligya han mga utanon- ngan tikang dida han ira halin, naiban hira hin diez porciento (10%) komo pundo han ira katig-uban. Han 2020, umabot ha P55,000.00 an ira kabug-osan nga benta han mga utanon.

Sumala kan Mrs. Ruth Ramirez, Coordinator han City Government ha Norte Tacloban, nga personal nag tambong han election of officers han G-HAB, ha pagtikang han proyekto dida han 2020 an Department of Agriculture an kasugbong han City Government hini.

Ngan, ha padayon nga dalagan hini nga proyekto pirme liwat aada an City Government para maghatag hin suporta ha mga parag-uma kay mando ni Mayor Alfred pakusgon an produksiyon ha pag-uma ha Norte Tacloban.

An pagkaada hin mga umhanan ha Norte Tacloban kun diin aadto an Relocations Sites han mga biktima han Super Typhoon, in kaparte han kan Mayor Alfred S. Romualdez programa ha paghatag hin dirodilain nga mga Livelihood Programs ha mga taga Norte Tacloban.

M. Padernos/CIO