Sementado na an pinaka hitaas, sagkahon ngan makuri agian nga parte han main road tikadto han 13.8 hektarya nga Ecological Farm (EcoFarm) ha Brgy. 106 Sto. Nino.

An EcoFarm an igin establisar han City Government of Tacloban ha liderato ni Mayor Alfred S. Romualdez nga lugar hin moderno nga pag-uma han mga farmers organization ha Norte Tacloban.

Komo usa nga livelihood o pakabuhi an pag-uma, aada an City Agriculturist Office ha pagmangulo ni Dr. Alfredo “Boy” Camposano, naghahatag hin technical support nga siguraduhon produktibo an magigin resulta han pag-uma.

Samtang, an Livelihood Cluster han City government ipinaagi han City Cooperative Development and Livelihood Assistance Office (CCDLAO), nga gin mamangulohan ni Mrs. Ruena R. Mate, padayon nga nabulig maiplastar an mga project proposal han kada Farmers Organization nga may tagsa tagsa lugar nga igin-aalutaga ha sulod han EcoFarm nga ira pagtatanuman han ira pinili nga klase hin tanum.

Sumala naman kan Mrs. Ruth Ramirez, Coordinator han City government ha Norte Tacloban, ipinaagi han pag sementoha han mga kalsada ha EcoFarm, madali na madadara ngadto an mga Farm Equipment ug iba pa nga mga kinahanglanon, ngan masayon na makakadto an mga karuyag mamasyada ngan kumita han lugar kay presko ngan mahangin ini nga dapit, nga ginlalantaw liwat magigin Eco Tourism area ha lakat han panahon.

Nahibaruan nga an sobra 20 nga mga Farmers Organizations ha Norte Tacloban in sige na iton paghag-id ha TESDA komo pangandaman han moderno nga pag -uma.

Siring ni Mayor Alfred Romualdez, ipinaagi hini, magkakaada hin pakabuhi an mga parag-uma ngan diri na an siyudad mag sisinarig nala han mga produkto tikang ha iba iba nga lugar, ngan magigin barato pa an mga produkto ha merkado.

An kalsada pag sulod ngadto han EcoFarm in aada ha talimutngaan han Northern Tacloban City National High School ngan Police Station 3 ha Brgy.106 Sto. Nino.

M. Padernos/CIO