Iginsumat ni Department of Information and Communications Technology (DICT) Regional Director Felix S. Tabanao, Jr. ha pakikipaghampang han City Information Office, dida han Huybes, Marso 9, nga aada la gihapon ha “low turn-out” o hamobo la gihap an ihap han mga nagparehistro han ira SIM card ha Rehiyon 8.

Sumala han opisyal, aada pala ha 28 porsyento an nagparehistro han ira SIM card ha bug-os nga Sinirangan Bisayas. Tungod hine ira naplaplanohan magdumara hin “Registration Caravan,” para magpadangat hin mga kinahanglan nga impormasyon bahin han sim card registration ha Tacloban City ngan magkalainlain nga lugar han rehiyon.

Ine mahitungod nga gin-oobligar naman gud ha ilarum han Republic Act 11934, o an SIM Card Registration Act, nga igrehistro an sim card para dire ine madeactive o magamitan pa kahuman han talaan nga petsa han pagparehistro.

Nakikita liwat han opisyal nga pira han mga rason kun kay ano gutiay pala an nagparehistro han ira sim an kawaray Telco coverage ha pira nga mga hagrayo nga lugar han rehiyon, ngan an kakulangan hin impormasyon.

Ha pagkayana, an talaan han pagrehistro tubtob la ha Abril 26, pero ginpaplanohan an pagpahilawag hine tungod han hamobo nga numero han nagpaparehistro.

Samtang, iginsumat gihapon ni Dir. Tabanao nga nakakuha hira hin kadugangan nga pondo tikang han opisina ni House Speaker Ferdinand Martin Romualdez nga nagkakantidad hin masobra Php 375 Million. Ine nga pondo gagamiton han opisina para han free public WiFi, disaster resiliency program, rehabilitation han 8 nga communication towers han opisina nga poydi rentahan han mga Telcos, ngan para procurement han mga laptops para han ira laptop distribution program, ngan iba pa nga mga programa.

Abri naman an buhatan nga namumutang ha A Mabini At., Port Area ha Tacloban City nga mag-asister hin walk-in clients nga maparehistro han ira SIM cards.

#CIOUpdates

#SimCardRegistration

via H.J. Roca/CIO

Photo: E.A. Lagahit/CIO