Tacloban City (Aug. 18, 2021)- Duduha ka pamilya ha Brgy. 103 Palanog iton nagpapailarom yana hin bulontaryo nga kwarintina agud masiguro la nga diri makatapon ha iba kun pananglitan naigo man han covid 19.

Pero ha luyo hini, siring ni Brgy. Kapitan Sibino “Botyok” S. Baldesco Jr., nagpapabilin nga talwas o negative hin covid an ira barangay- , kundi bisan paman kun sugad, ira gihapon iginpapatuman an mahugot nga mga Health protocols para makasiguro nga diri malulusotan han covid-19.

Ha butnga hini nga pandemya, an City government of Tacloban ha liderato ni Mayor Alfred S. Romualdez damo an gintatagan hin ayuda ha bug-os nga 138 nga mga barangay han siyudad, sanglit siring ni Kapitan Baldesco para mabuligan an siyudad, an ira barangay in pumalit liwat hin ginatus-gatos ka sako hin bugas ngan tag 10 kilos an ipinanhatag ha kada pamilya haira bug-os nga barangay.

Barangay Disaster Risk Reduction Management fund (BDRRM) an ira gingamit nga pundo pamalit han ayuda nga pagkaon.

Yana nga medyo nakakagios na hin pakabuhi an mga tawo, an mga naka self-quarantine nala an gin aayudahan hin tag 5 kilos nga bugas ngan hin sardinas, siring ni Kapitan Baldesco.

M. Padernos/CIO