Nagpahinumdum an buhatan han Business Permits and Licensing Division (BPLD) ha mga drayber nga magin kalmado ngan halabaon an pasensya samtang naghahatag hin serbisyo ha mga manarakay ha kadalanan han Tacloban.

Ini kahuman igreklamo an usa nga PUJ driver han mga kag-anak han iya pasahero nga otso-anyos nga bata nga gin-guliatan kay kuno kulang an iginpasahe.

Agud ma-klaro an issue han insidente nga nanabo han Setyembre 28, mga alas 12:30 han udto, ginpatawag han buhatan han BPLD an ginrereklamo nga PUJ driver ngan an mga kag-anak han nagreklamo nga pasahero han nakalabay nga Oktubre 2.

Napamatud-an dida han patawag nga an ginrereklamo nga driver amo in nakatalapas han ordinansa pinaagi han binuhatan nga ”overcharging” ngan “arrogance and discourteous conduct.”

An Overcharging ngan Arrogance & Discourteous Conduct in pira la han sukot nga violations han mga MCH ngan PUJ drivers ha syudad. Pira nga kadugangan hini amo an NO Business Permit, NON-Compliance, NO-Driver License, REFUSAL to Convey Passengers, FAILURE to offer Senior Citizen/Student Discount, UNREGISTERED Motor Vehicle, Reckless Driving, ngan Disregarding Traffic Sign.

Pag-aghat han BPLD, ipadangat dayun ha ira buhatan an mga reklamo ha mga PUJ Drivers ngan MCH Drivers agud mahatagan hin kaangayan ngan abtik nga aksyon. Makigsumpayan la ha BPLD Hotline 0905-413-4018.

| Via rpa cablao /CIO with a report from cb merin /CIO

PubMat by rd ortega/CIO