Tacloban City ( Dec. 09, 2021) – Haros tapos na an dako nga kanal ha butnga han New Hope Village pabahay ha Brgy. 107 Sta. Elena han Tacloban- usa nga proyekto nga iginpatuman han City Government of Tacloban ha ilarom han liderato ni Mayor Alfred S. Romualdez ngan han DPWH agud matalwas an mga molupyo hini nga lugar hin padughan nga babaha panahon hin sugad yana nga duro an uuran.

Ha pagbisita han News Team kanina han aga samtang sige nga uuran, nakita nga waray na gud man pagbabaha-i an pabahay-sugad han aada nakikita ha mga letrato.

Mahitungod hini, hi mana Belen Jacusalem usa han nagpahayag hin pagpasalamat hini nga proyekto kay han yana nga pag-uuran waray na hira pagbahai.

“Okay na ini, dako gud nga bulig”, ini liwat an pahayag ni mano Panoy Navares nga pirme nagsusugbo ha baha panahon nga ginbabaha pa hira han una. An duha nga adlaw nga sagunson an mag-aga nga uuran, kun waray ini nga dako nga ginhimo nga kanal, siguro lurop naman kami han baha, dugang nga pahayag ni mano Panoy.

Samtang, usa nga nanay an nagpahayag han iya pagka subo nga may-ada nira mga igkasi aada ha pabahay nga ginhihimo nga labugan hin basura an entrada han dako nga kanal nga bag-o pala nga gin construct.

Sako, sako ngan dagko nga sinilopin nga basura an iginlalabog dida han kanal- sanglit nababaraka hiya nga ha diri maiha pagbabahaon nanaman hira kay masasarop hin basura an kanal, siring hini nga nanay.

Ha lain nga bahin, bisan kun suspendido an trabaho ha Tacloban dara han kamaraot han panahon, nahisipatan han news team hi Mrs. Ruth Ramirez, Head han North Tacloban City Hall Extension, nga nag iinspection ha New Hope. Dida hini iya nakita an kadilikadohan nga madisgrasya an mga bata nga nagmumulay, nakarigo mismo ha entrada han dako nga kanal- nga sumala ha iya bangin mahulog nga madara ngadto ha sulod han kanal dara han makusog nga sulog han tubig kay waray hini sagpo o kun ulang dida han ba-ba han kanal.

Siring ni Ramirez, iya ig cocoordinate ha City Government ngan DPWH ini nga butang agud matagan hin solusyon.

M. Padernos/CIO