Kasumpay han International AIDS Candlelight Memorial nga ginhinomdom kakulop, nagbuhat hin candlelight memorial an buhatan han City Population Office ha may I Love Tacloban marker ha Kanhuraw Hill Tacloban City dida han Biyernes, Mayo 19, 2023.

Durante han programa nga “Oras Han Tacloban” ha RMN Radio gin-isplikar ni Jemimah Dalore, Adolescent Health Development (AHD) Program Coordinator han CPO kun ano an importansya han ginbuhat nga aktibidad.

Sumala kan Dalore nga ginbuhat an Candlelight Memorial para hinumdomon an mga biktima han sakit nga AIDS (o an acquired immunodeficiency syndrome), ngan tagan hin duon an mga programa may kalabutan han HIV (human immunodeficiency virus) awareness campaign ngan an pagtanggal han stigma o an negatibo nga panlantaw han mao nga sakit.

Siring pa ni Dalore nga importante ine kay nagtitikabata an naapektaran han sakit tungod nga diri nag papatest tungod han “stigma” nga nakakanit hini.

Subay pa han ginkakaptan nga datos han opisina mayda na 236 nga kaso hin HIV an syudad tikang han dekada 80s.

Kaurugan han mga nahipatik nga kaso nahihisulod ha age group nga 25-34 years old. Ginkabarak-an gihapon han opisina an nagtitikabata nga nahihitapnan han sakit kay basar han datos mayda na gihapon mga kaso ha 15 to 24 years old nga age group.

Tungod hini nga kahimtang gin-aaghat han opisina nga magpa-test an mga kabataan ngan diri magbuhat hin “unprotected sex.”

Upod gihapon han mga serbisyo han opisina an pag-endorso o pagtobyan hadton mga nanginginahanglan hin HIV test ha City Health Office kay siring pa nira nga early detection an pinakamaupay nga panagang kontra han sakit ha AIDS.

Iginsumat ni Dalore nga poydi mag-walk-in o pumakadto an mga kabataan nga nanginginahanglan hin counseling ha ira opisina nga namumutang ha Balyuan Building ha may Balyuan Grounds ha Magsaysay, Tacloban City o magpadara hin mensahe ha ira social media accounts: @citytacpop ngan @ahd.tacloban ha Facebook. An ira liwat mga hotlines amo an masunod: Landline: (053)-300-3255; Globe/TM: 0997-816-1049, ngan Smart/TNT: 0930-887-1958.

#CIOUpdates

#AIDSCandleLightMemorial

#TaclobanCity

: HRoca/CIO

: AHD Tacloban

Researcher: ELagahit