Ha padayon nga pagpabaskog han programa pan-agrikultura ngan pangisda han syudad han Tacloban, iginlunsad han City Agriculturist Office, kaupod an City Planning and Development Office, an 2020 Tacloban City Agriculture and Fisheries Statistical Profile.

An nasabi nga statistical profile amo in nagpapakita han mga datos han napulo (10) nga areas han Tacloban ha linya han agrikultura ngan pangisda, sugad han land classification, registry system han basic agriculture, ngan an numero han nagpaka-rehistro nga mga parapangisda ngan parag-uma han syudad.

Ini nga mga impormasyon nga makikit-an han nasabi nga statistical profile in usa nga legacy project ni City Agri Head Dr. Alfredo “Boy” Camposano ha tinguha nga makaghatag han mga kinahanglanon nga mga detalye ngadto han mga parag-uma, parapangisda, government employees, studyante, kliyente, civil society organizations, ngan mga stakeholders han syudad ha magkadirudilain nga kagaramitan.

“Sige an saka ngan pag-uswag han syudad, so we should keep up with the trend of its progress,” sumala kan Dr. Camposano, ha butnga han iya paglaum nga ini nga proyekto in mahipadayon ha maabot nga mga tuig bisan kun waray na hiya ha serbisyo.

Samtang, ha luyo nga an Tacloban usa nga Highly Urbanized City (HUC), gintatalinguha ni Mayor Alfred Romualdez, kaupod an City Agriculturist Office nga masigurado nga buhi ngan mabakod an agrikultura ngan pangisda han syudad.

RPA-Cablao/CIO