Tacloban City (Dec. 20, 2021)—Waray ha edad o ka lagas an pag-aram, kundi aada ha ka determinado ngan kamaduruto.

Ini in napamatud-an ni Felipe Agero, Sr., 70 anyos, nga osa han mga nag gradwar yana nga adlaw han kurso nga Organic Agriculture Production NCII. Hira han ika Batch 15 hini.

Siring ni Felipe, bisan kun hiya in edaran na waray niya ikaawod nga mag-eskwela para han moderno nga pamaagi han pag-uma kay iya ini magagamit samtang hiya nag-uuma ngan iya pa maitututdo ngadto han iya mga anak ngan mga apo.

Dida han 20 nga mga estudyante nga nag gradwar yana nga adlaw, hi Edmar D. Sedillo an pinaka bata ha edad nga 18 anyos, siring niya hirayo pa an dadalaganan han iya nahibaroan ha moderno nga pag-uma mahitungod nga bata pa hiya, ngan dako ini nga bulig haiya kalugaringon ngan haira pamilya.

Ini nga padayon nga pagturun-an hin moderno ha pag-uma in osa nga proyekto han TESDA ipinaagi han Pitahaya Farm ha Brgy. Salvacion ngan ha pakigbinuligay han City Government of Tacloban ha liderato ni Mayor Alfred S. Romualdez.

Sumala kan Mrs. Ruth Ramairez, In Charge han North Tacloban City Hall Extension, iginduduso gud ha Norte Tacloban ni Mayor Alfred an Modern Farming, sanglit an mga estudyante hini nga kurso in puros mga taga Norte Tacloban nga mga kaapi han Farmers Association.

May 13.8 hectares nga EcoFarm an City Government ha Norte Tacloban para pag-uumahan hini nga mga namag gradwar han moderno nga pag-uma.

Nagin bisita dida hini nga gradwasyon hira, TESDA Leyte Provincial Director Renato De la Cruz, Jr.; Tacloban City Agriculturist Romelo T. Anade; Carlo Magno Valle tikang ha buhatan ni Sen. Cynthia Villar, ngan Pitahaya Farm School Administrator Joselito “Boyen” Castillejos, Jr.

M. Padernos/CIO